2014: ‘Na festa ‘rranciàta (di Emanuele Castrignanò).

Auànnu, festa senza Cumitatu

e fatta cu do’ sordi ch’hannu tatu

li fitèli cu tanta divuzioni

pi’ nnuràri la Matonna ‘n prucissioni.

Li stiènti e li uài ti li cristiani

hannu ncurtùtu li razzi cu li mani,

so’ picc’ormai a ci si cala ‘m pota

pi’ fa’ l’offerta ca si facia ‘na vota.

Quddu maru Cumitatu ca girava

pi’ li strati e ‘na porta no’ lassava,

sà tuzzàva ci ‘ncun’ànama l’aprìa,

sia ti sera, ti matina o menzatìa.

E toppu tanti migghiàri ti pitàti

parulàcci surtantu hannù pigghiàti

e pi’ stu fattu e pi’ la dignitàti

alla Chiesa sti ntràbbichi hannu tati.

‘Na festa ‘rranciata, appena, si sta faci,

no’ c’è cumìtulu senza la vammàci,

ccussì to’ pali ti luci hannù ìmpizzati,

non c’èrunu sordi e stàunu ndibbitàti.

La Matonna sapi, si ticìa ‘na vota,

e auànnu non c’è capu e non c’è cota.

Puru Ton Giuseppi mo’ nd’hannù llivàtu

e no’ sapìmu ci l’hannù pajàtu.

Emanuele Castrignanò

Mesagne, 15 luglio 2014