Elezioni: in campo anche Cocu ti la 'Ngegna con la lista "ti la gnanda"!
Carissimo dirittori,
chi ti scrivi è il figlio di Cocu ti la ‘Ngnega, pirceni papai no sapi scriviri al copiuti. E ti ora annanzi, il figlio scrivi e l’attani ddetta, taccosì ci ncuna cosa no vai, ti la pigghi direttamenti cu iddu e non ccimienti a mmei, ca so piccatu.
Carissimo dirittori,
sono Cocu ti la Ngegna e ti scrivo pirceni ieri sera aggiu passatu ti lu sitili e aggiu vistu tuttu chiusu, puru la putea ti ssignuria ca la tieni sempri aperta (noni quera ti li quazi, statti attientu!). Aggiu ddummandatu e nisciunu sapia nienzi.
Era passatu cu ti ticu l’urtimatu: o mi fai il cuntrattu cu fatiu cu lu giurnali tua o vau ti fronti addo sta fannu nnatru giurnali. Aggiu spittatu la festa ti la tonna (ca no eti la mugghieri ti lu tonnu) e ieri era vinutu ddo tei apposta cu ti ticu ca no pozzu cchiù spittari pirceni mi anno titto ca stanno “maturando tanti ccasioni” (ca no sontu culummi cu li ttanti e viti ci so bbueni o so ancora usci), mo ca stannu li lizzioni.
E taccosì propria l’atra sera a tuzzatu a casa ntra la Ngegna un bellu giovini ca mi a ditto: “Buona sera Coco, ti pozzo invitari a una riunioni sotta alla villa a Scarano? Siamo un cruppo ti amici e stai puru cumparata Antonio, ca mi à fatto il nomi tua. Stiamo vitendo cu faciamo una lista”.
Acccquà ha assuta moglierima ca stava nel corritorio e figlioma ca ti sta scrivendo e ca è capito tutto, pirceni mi ha ditto ca mi vuoli fari la campagna littorali ca eti ntra lu paesi e noni fori ca quella eti nnatra campagna, cu l’arvuli, li roddi, il puzzo e la casa, il puzzo artisianu e il piloni ti quando devi pompari.
Moglierima, anveci, era pinzatu alla lista ti la spesa e nci à dittu al bellogiovini: “Crazzi assai, beddu mia, ma nui campamu stritti e campamu tritti e no abbiamo bisuegno ti nienzi e vva ddinciulu a ci ti manda…”.
Io mi ò ncazzatu cu mugghjierama ca no ha capitu, laggiu mandata ntra la cucina e anveci ho rispuestu al giovini ca mi sintia cu cuparama Ntognu (cuddu ca tè mattunatu nanzi casa) e ca forzi sciumu alla villa (noni comu sta pienzi, pirceni quando tu mandi affafottiri ncununu nci tici: “Alla villaaaa!”).
E nzomma, lu ggiurnu toppu, verzu li sei ti toppumangiari, ca la matina mi ero ntiso cu cumparama, cumparama passau ti casa e abbiamo andati alla villa, addove nni sta spittava il giovini ca ti sono detto. Nne data la manu, abbiamo andati al barro, nni à ditto ca tobbiamo fari un procramma tuttanziemi, ca noi, noi (noni tuni cu quedda barba) siamo i protaconisti di Misciagni e ndi a dittu cu pinzamu picca ggiurni pirceni nni voli canditati ca ndi possiamo puru scapari la lista, che nce ne stanno tante. Me lè dditti puru toi o treti, can ci sto pinzandu, pirceni cu cumparama Ntognu, quazi quazi (noni li pantaloni) nni faciumu nnatra anziemi. Solamenti ca mo no nni sta ccugghimu pirceni iddu ca pensa sempri alla villa quando sciamu e vinimu raggiunando la voli chiama (la lista) “La vasca” nnu pocu pirceni la funtana nostra sembra nna vasca, nnu pocu pirceni quandu si camina annanzi e aggretu si tici ca nnnamu fatti nnu poco ti vaschi.
Io, anveci, vulia facia la lista ti “la gnanda” taccosì mi piglio i voti ti tutti quiddi ca scrafazzunu gnandi scendu e vinendu sotta allarvuli ti li gnandi ti la villa.
Tegno tiempo fino a totta sta sittimana cu penzu: cuddu beddu giovini, mazzu e iertu cussì mi ha ditto. Però iu no vogghiu assai. Ci tu mi facivi il cuntrattu era megghju. Ci noni, ti lu sta dicu, va tuzzu ti fronti allu giurnali nuevu.
Sa ccè sta penzu? Fammi il cuntrattu ca ti osci alli lizzioni ti scrivu ogneggiurnu una culacchia.
Iu sta spettu sa’!
Tuo fizzionatissimo
Cocu ti la ‘Ngegna
