L'Assissori no' nci parla cu ci no' capesci!
Carissimo ddirttori,
poi dici che no ti mando a fafottiri tuni e tutti l'amici tua... Tu sai ca iu non nci vogghiu scrivu cchiu pirceni nossono giornalisto comu a quiddi toi colleghi tua (e noni mia) ca tieni ti fronti. Propria ieri canàtoma – lu maritu ti sorma – ca stai su fastibbuccu mi ha dittu ca no capescu nnu cagnu, ca ci puru iu era statu sobbra a stu cosu essi letto li cosi ca scrivi l'assessora cu la paglia ncapu e ca nzomma mi ha dittu: “Va scrivi figghiuta a nnatra vanda e noi a ngigniria e mancu alla rchituttra o amiticina o a leggi (noni lu sciuecu cu la birra) ca non nce nienti ti fari”. Poi ha ditto: “Figghiuta eti comu nnu fessa e tienutulu a casa”.
Nnatru picca nci azu li mani. Poi nci aggiu tittu: “Ca figghiuma l'ha puru vattisciatu e moni sta faci tecula propria lu sciuscettu tua ca voli faci li pruggetti com'a ttei!”.
E qua è ssutu cuddu cosu ca ha misu sobbra allu situ tua (e noni mia) cull'assissori culla paglietta ncapu. M'aggiu fattu leggiri cuddu ca è scrittu – fonti fastibbuccu ha scrittu tuni e non aggiu capitu nnu cagnu. Quiddi bbueni ticuno quandu uno parla ccussini ca annu capitu tuttu. Iu ca so villanu no aggiu capiti nnu cagnu e loru ticuno ca “si parlono attosso” iu attosso, quand'era piccinnu mi ticia mama ca mi facia nnatra cosa.
Tuni, inveci, ca sei giornalisto, mi tevi spiacare cce significata “qualità in architettura” e mi tevi anco spiacari “urgenza contingente”, pirceni l'urgenza, mi ha ditto il mietoco mia ti lu prontu soccorso è sempri contingenti pirceni ha dittu puru, mo ti spiecu cu nnu fattu, pirceni si fessa. E mi ha titto: “Quando ha sciri a cabbinetto ca ti sta scappa cce t'eti?” e io nci ho risposto: “Urgente”.
“Bravo”, mi ha ditto e poi mi ha ditto di nuovo: “Contingente chiù o meno significa la stessa cosa, pirceni significa nna cosa ca no succeti spesso. Quindi sono pensato ca ci ticu “urgenza contingente” mi fazzu sotta to voti o sempri ccussini. E qua puru lu mietucu mia m'è mandato a fafottiri e mi ha titto ca sono propria fessa.
E ho tornato ddo canatoma pirceni ti quiddi richi ca mi stava facendo liggiri attanta fatica no stava capendo propria nienti. Allora, tico io, pi i poviri alfabbeti com'ammei ca volono fanno i figli provessionisti como ama ffari?
Io puro so piccato: io quando mi ho leggiutu tre voti “visione di una prospettiva” mi ha titto il mietoco ca nci vogliono armeno tre pari ti acchiali: uno pilla visioni, unu pilla prospittiva e uno cu mi mparu a leggiri, pirceni mi ha ditto lottico ca ho sciutu pi un paro t'acchiali. Mi ha misu prima un paro, poi mi ni ha miso nnatru, poi nnatru. Poi mi ha titto: “Ma tu sai leggiri?” et'io gli ho rispuesto: “Ca ci sapia leggiri, addo te vinia pi l'acchiali?”.
Mo tu ti stai ticendo: e custu, ca no sapi leggiri, comu ha fattu cu leggi quedda cosa fonti fastibbuccu e cu mi scrivi questi lettira. E iu ti rispondu: “Mi la scritta cuddufessa ti figlioma ca voglio fare o ngigneri o architetto o archiologo o mietico o aucatu” e ti saluto cupiando: Questa per me è la politica urbana” ti un patri dispiratu pi un figlio fessa.
Coco ti la Chiazza
