Cocu ti la chiazza e l'urtimo ti l'anno!
Carissimo ddirittori,
nci voleva l’urtimo ti l’anno cu diventu giornalisto. No ca mi hanno tato il tesserino, ca avoglia cu spettu! Ho divintato giornalisto pirceni como i crunisti tella carta stampata iu oggi non ho fatiato ca mo ti spieco.
Stamatina, cuando ha carmata la nevi, mi sono fatti quattru passi ntra Misciagni etò passato ti l’orefici amicu mia ca scrivi pillagazzetta. Gli sono titto: cosa liggimu tomani? E iddu gentili mi à risponduto: “Caro Coco, noi oggi noffatiamo, pirceni tomani i giurnali no essono!”
Veramenti mancu osci anno rivvati i giurnali a Misciagni pillanevi, ma tomani no essono e siccomo io non o andato fori pirceni nivicava, mancu iu aggiu fatiato.
Quindi osci no amu fatiatu i giurnalisti e iu e quindi sono divintato giurnalista l’urtumu ti l’annu.
E mo non sacciu comi nni veni pillanevi! Iarsera ho andato cu cumparama Ntognu aggiro pi Misciagni e ndi abbiamo firmati a piazza Commestibbili ca no eti nna famiglia ti signuri ti Misciagni comu ca dici “il signor Commestibbili”, “la signora Commestibbili”, “la signorina Commestibbili”. No, caro ddirittori, i commestibbili, mi ha titto Giuseppi Floriu, sontu li cosi ti mangiari, comu lu pani, li favi, lu funucchiu culla sparacina, li muleddi e li perinatisuli. Tutti sono commestibbili.
E nsomma, quando abbiamo rrivati alla chiazza mi ho ricurdato ti quando era vagnoni ca stava Zzarrafina la greca ca vindia li cicureddi e nunnu iattuddu; ncera Fernando ca vindia lampasciuli e a quedda chiazza successi lu fattu ti Fiorentinu Pignatelli, lu sartori bonanama, ca quandu si sciaccattau l’ampasciuli tissi: “A me l’ampasciuli e la terra ai contadini!”.
Poi ncera Romeo cu tanti pezzi ti casu e nceruno li ucciarii. Io mi riccordu ca la bonanama di sirma mi mandava ddo Alfonzu Valintini, l’attani ti lu tuttori ca mi ha fatta l’opirazzioni.
Iu quando scia, vagnoni, lu cristiani sapia tutto encerti voti mi ticia: “Tini a sirda ca non nci nn’eti pi iddu” e mi nni turnava a casa senza la carni.
Mo propria nna vota ti l’urtumi ti l’annu, sirma mi tissi la sera prima: “Crammatina, vani ddo Alfonzu ca aggiu ordinato l’agnello pi crai!”. Mi lassau puru tecimilaliri. Iu anveci, ca erono vacanzi, prima mi sciattirai li crasciuli a pallonni allu campu ti li Tumminicani e poi tuzzai a casa cu dicu la buscia. Mi sta priparava cu li sordi mmanu e cu ddicu: “Nà, è dittu Arfonzu ca non ci stai l’agnellu!”. Prima cu fazzu tutti sti cosi, propria mentri sta rrivaca a casa, mi rrivau sobbra alla cutedda nnu lleccapiatti ca ncora mi lu rricordu. Mi ggirai e veddi sirma culla ncartata ti l’agnellu. Era sciutu iddu all’ucciaria, ca mama era cucinari. Ci no la carni non si cucia pi llu ggiurnu toppu.
Iu zittu. Ccera diri? Come ticia nna cosa mi pricipitava e allora mi stessi zittu: nci turnai li sordi a sirma e cu fazzu a vetiri mi nni scii ntra la stanza, pigghiai lu libbru e ncuminzai a scriviri comu sia ca veramenti mi sta facia li compiti pilli vacanzi.
Ma tu nci pienzi? L’urtumi giurnu ti l’annu, iu, vagnoni ca sta facia li compiti. “Lu spramienti vali pi cientu!”, sintinziau la bonanama ti mama, ma ritia pirdenni anveci cu mi fazzu la rascioni mi feci piccinnu piccinnu. E sorma: “Ha ccappatu, fessa piccinnu!”.
Conclusioni, a ci cchiui si ssuppava la fedda. La sera ti la visciglia mancu nci mangiai cu tegnu lu puntu, loru sciucaunu a tombula, a munticchiu e a settemmienzu, e iu mancu spittai menzanotti. Ma lu giurnu toppu sciu tutto megghiu. Noni pillagnellu. Mama era fatta la sagna (noni la sagna ti moni ca si stannu pinziculando i giurnalisti veri ci si mangia ti sera o ti matina); la sagna bbona, bella ti sustanza e siccomo era stato bravo il giurno prima, mi nni tessi to piatti. E puru crai spiriamo cu mangiamu forti!
Creu ca si tici: bbona fini e bbon principiu. Ma ci no si tici ccussini, giusta tuni, caro dirittori. Ci no, pirceni ti tegnu?
Coco
