Ottu Marzu ti tanti anni aggretu.

Sta matina caminandu ntra Misciagni aggiu ncuntrato pi pprima na cristiana cu nu fazzuletto rrutulatu a forma di frisedda sobbra alla capu e sobbra allu fazzulettu nu taulieri cu li pagnotti ti pani. Era la furnara, ca sta scia e vinia ti lu furnu sua, sta scia a casa ti li cristiani pi pigghiari lu pani ca l’era cociri, e poi quandu l’era cuettu nci l’era appurtari beddu cautu cauti. Pi lla strata tutti la canusciunu e tutti la salutaunu e edda a tutti rrispundia, sempre ti pressa ti pressa, puru iu l’agghiu salutata : “Bongiornu nunna Marì”, e edda “bonggiornu puru a tei”, sempri ti pressa cu lu taulieri ncapu. Caminandu caminandu, aggiu passatu vicinu la casa ti la nunna Ntunietta, la mestra, cuedda ca cosi li rrobbi a tanti femmini, cosi l’abbutu ti sposa a ci s’a va mmaritari, e cosi puru, subbutu subbutu, l’abbutu pi l’urtumu viaggiu.La nunna Ntunietta stava sotta alla porta, e ntra casa sua, ntra la prima stanza, cuedda ca tinia la vitrina, ca si vitia dda ffori, quattru, cinqu siggnurini, una cchiù bedda ti l’atra, ssittati a ciercu, stava ci cusia, ci rricamava e ci mbastia.

 

Ci mitti recchia, quandu passi ti dda nnanzi, sienti ca sta parlaunu zittu zittu ti cuddu ca annu fattu la sera prima o ti cuddu ca ann’a fari la sera ca ava vviniri.

Nu picca cchiù nnanti, n’atra cristiana sta nquacinava cu lla cauci la parti cchiu vascia ti la facciata ti casa sua, lu zzucculettu, era la nunna Vita.

La nunna Vita, era sciuta sempri fori, ti quandu era piccinna, era sciuta cu mammasa e cu lli suluri, sempri a sciurnata, ca terra nonni tinia e moni ca s’è fatta cchiu vicchiaredda fori non ci sta vai cchiui.

Quandu si ncontra cu latri femmini ti la eta sua si menti a parlari e a cuntari ti quandu scia a vindimari alli Baruni, o ti quandu scia a ccogghiri l’aulii all’Acquaru o ti quandu scia a vintulari lu cranu alla massaria ti Vaccaru, e ogni vota non manca mai cu ddici: “Nna mu fatta fatia! Sotta a llu soli, cu llu friddu e puru sotta all’acqua.”

All’angulu ti la strada, vicinu alla funtana staunu, quattru femmini, cu lli menzi pi l’acqua, no tutti tiniunu l’acqua ntra casa e mentri ca anchiunu li menzi una toppu l’atra, parlaunu ti tuttu e di tutti e ci vulivi ssapivi ncu nnu fattu bastava cu ti firmavi vicinu alla funtana.

M’agghiu firmatu pi mbeviri e mentri ca sta mbivia, aggiu sintutu ca Santina s’ava spusari lu mesi ti Maggiu e ca fori non ci ava sciri cchiui pirceni, lu zitu teni nu bellu lavoru, eti artieri, faci lu bbarbieri e aggiu sintuto puru ca l’ovi frischi li vinde la nunna Cuncetta.

Aggiu lassatu li quattru femmini alla funtana e chianu chianu aggiu rrivatu vicino alla chiesa ti San Cosumu, dda vicinu aggiu ncuntratu to femmini ca sta ssiunu ti la chiesa, erunu toi zzitelli, tantu devoti ca ogni matina vannu alla chiesa.

Nnanzi a San Cosumu aggiu ncuntratu puru zziama Rosetta, ca era a sciri alla chiazza cu ccatta to cicori e l’ agghiu ccumpagnata.

Amu trasutu ntra la chiazza cuperta, tanti banchi una ti costi all’atra, ti frutta e ti virdura e cretu a ogni banca nu nunnu o na nunna ca sta vindia, nc’era puru la nunna Lucia, quedda cu lli capiddi neri neri, ca vindia cicori, rapicauli, acciu e funucchiu.

Toppu ca zziama e furnutu cu ccatta cuddu ca li sirvia, amu sciuti versu la Porta Grandi e ddani nda mu salutati, edda se nne sciuta mmeru casa sua e iu aggiu continuatu a camminari.

Aggiu passatu ti ntra la villa, m’aggiu firmatu nu picca vicinu alla funtana, era chiena d’acqua e ntra l’acqua staunu puru li pisci russi.

 

L’orologgiu ti lu Sitili, e sunatu già menzatia e chianu chianu, caminandu sobbra a la strata ti Latianu, aggiu rrivatu vicinu alla scola elementari.

Tanti vagnuni annu assuti ti la scola, masculi e femmini, li masculi cu lli vantili neri e fioccu blui, li femmini cu llu vantili biancu e cu llu fiocco puru blui, ti cretu a loru, li mestri ti la scola.

Osci: Ottu Marzu duemilaquattordici.

Osci eti la festa ti la donna, na festa ca tanti femmini ti lu paisi nuestru non annu mai canusciutu, eppuru erunu femmini e cè femmini!

Femmini ca annu fatiatu ti la matina alla sera, annu crisciutu fili e niputi, annu suppurtatu tuluri e sufferenzi e tanti voti annu statu puru mmaltrattati.

Alla nunna Maria, alla nunna Ntunietta, alla nunna Vita, a tutti li femmini ca annu sciuti fori, sotta a llu soli, sotta all’acqua, alla nunna Cuncetta ca vindia l’ovi, a Santina, alli siggnurini ti la mestra, alla nunna Lucia, alli piccinni femmini ca sta ssiunu ti la scola, alli mestri ti la scola e a tutti l’atri femmini, nu ca simu fili ti quiddi femmini, nc’ama ddiri grazii, pi tuttu cuddu ca annu fattu, pi tuttu cuddu ca nd’annu tittu, e ci osci putimu fistiggiari e parlari ti libbertà eti puru grazi a loru.

Carmelo Colelli

Bari 8 Marzo 2014

Per offrirti il miglior servizio possibile questo sito utilizza cookies. Continuando la navigazione acconsenti al loro impiego in conformità della nostra Cookie Policy.