Li mulùni pi’ la Chiesa (di Emanuele Castrignanò)
Stava nnu Papa qu’à Misciagni
crandi espertu ti macàgni,
ticìa messa e cunfissava
bbella vita si spassàva.
Tinìa terri e prupritàti
ti minzàtri curtivàti,
e puru tannu comu moni
si spartìa la protuzioni.
Ccussì fòi pi’ li mulùni
ntra minzàtri e li patrùni,
e lu Papa ca sapìa
menza parti pritindìa.
Era usanza, poi, uardàri,
li mulùni sumintàri,
li cchiù bbuèni si scapàunu
cu nna croci si signàunu.
Tuttu qustu si facìa
quandu no’ si nni ccugghìa.
Cè la rrobba mmaturàva,
già lu Papa prontu stava.
Li mulùni ca tagghiàu
fora quiddi ca signàu
lu minzàtru, ca chiantàu,
e ccussì ndi li purtàu.
Lu villanu jastimandu
mo’ lu Papa scia truvàndu
cu nci tici: “Non esisti
ca li mègghiu ti futtisti” !
Ma lu Papa, navicàtu,
rispundìu, sia scurnàtu:
“ Alla Chiesa nc’è tuccatu
ddò la Croci tu ha’ signatu”
Emanuele Castrignanò
