Elezioni Comunali a Misciagni 2015 (di Emanuele Castrignanò)

Non poteva mancare un componimento in vernacolo di Emanuele Castrignano su quanto si sta verificando in Mesagne in questi giorni di campagna elettorale. Al solito pungente e spensierata la satira di Emanuele si ripropone ricca di spunti e di argute osservazioni. Godiamocela.

 E’ ‘rrivat’a conclusioni puru st’Amministrazioni

mo’ Misciagni è ‘ncasinata cu supporta l’elezioni.

A ci cchiu’ si menti in lista, a ci cchiu’ voli lu votu

ca ci po’ va essi iddu, av’à fa’ ‘nu ddirramòtu.

Nc’è lu pòpulu cunfusu, e no’ sapi cè av’a fari

tanti facci e tanti listi, a ci cazz’av’à vutari.

Tutti mo’ ca ti salùtunu, tutti ca t’hannà parlari,

ciò ca cièrchi o ca ti servi, tuttu moni si po’ fari.

Av’assai c’hannù partuti sia Molfetta e Matarelli,

e li viti sempr’ansiemi, mancu ci sontù gimelli,

sontu puru sustinùti ti la Uilli ti Vizzìnu,

iddu ch’è lu veru capu ti ‘nu cruppu cittatinu.

Ginu sapi, Ginu stutia comu sav’à cumpurtàri

pi’ l’impegnu ti lu figghiu ca la genti av’à vutari,

ca si trova ntra ‘na lista ti Emilianu candidatu,

comu Sinducu ti Puglia, iddu ch’era Magistratu.

Ci va’ giri lu paisi e lu vueti intra e fori

truèvi sempri a ogni pizzulu strulicàri lu tottori,

iddu, sì, Ninni Mingolla, cerca voti e sustinùtu

e di quddu ca ti tici voli èssiri critùtu.

Comu quandu allù Spitali ti vitìa e ti visitàva

poi l’analisi uardàva, prontu prontu sittinziava:

“Ci alli chiùppi no’ vuè vai, no’ vuè misu sottaterra

t’hà tinìri, fessa mia, ca la panza stà spitterra.”

Sta Sabrina, mara edda, finarmenti canditata,

èti ‘na carosa bbedda, ti prisenza e sistimata,

voli nchiàna allu Cumuni e lu Sinducu cu faci,

cu l’attàni gira e vota, ma no’ pigghia voti e paci.

A Misciagni, si sapìa, Forza Itaglia s’è squagghiàta,

nsiemi a Cici, puviredda, sola sola hannù lassàta,

so sicuru no’ mi sbagliu ca lu pìnnulu cchiù amàru

nc’è lè datu Semeraru,

gran fascista sficatàtu,

ca stavota s’è vutatu e cu tutti s’è scusatu:

“iu m’impegnu e dàu ‘na manu

a Molfetta, sanu sanu.”

Cè diciti, vàu stunatu o pi’ casu mi sta sbagliu?

Senz’avìri ‘nu mutivu mi sta scordu l’Ammiragliu!

Genti nova e mutivata ca l’è puru canditata,

fèrma tutti, fèrma a mei pi’ lu cìvucu vintisei.

Lu sustièni Calabresi, ch’è sbattùtu ‘ncunu mesi

cu po’ fa’ lu canditatu, cu Schittuli s’è truvatu.

Puvirièddu, ddò è furnùtu, ca si trova nutu nutu,

senza Poli e Birlusconi, po’ lassàri già ti moni.

No’ canoscu cinqu stelli, so’ pi’ mei sulu fratelli

vesciu giuvini e carosi, frischi frischi comu rosi.

Puru loru ponnu stari e ‘na manu ponnu tari

pi’ gistiri stù paisi, cu li uài e senzà turnisi.

Maggio 2015     Emanuele Castrignanò