Emanuele Castrignanò diventa giorno per giorno il cantore della nostra Mesagne e non c'è occasione che non viene rivisitata per lasciare uno spazio di sentimento attraverso la poesia. Non poteva mancare, ovviamente, un qualcosa che riguardasse la Madonna del Carmine, protettrice della nostra città. Emanuele ci ha inviato tre componimenti che pubblichiamo di seguito
Matonna ti li Càrmunu!
Rit. Matonna ti lu Càrmunu,
Matonna bedda mia,
prutieggi li villani,
scannàti ti fatia.
So’ fili com’all’atri,
no’ ti li puè scurdari
e tu ca si’ la Mamma,
lu sai com’ata fari.
Puru ca vannu fori
e fannu li villani,
ti facci so’ puliti,
ma caddi ‘ntra li mani.
S’àzunu già ti notti
ca no’ nc’è ‘llucisciutu
e fori va’ fatìunu
puru ca è chiuvùtu.
Sott’allu soli e jentu,
mai fermi nu mumentu,
la spadda scutursàta,
ca mai s’è rripusata.
Fatìunu comu pacci,
‘ssuppàti ti sutùri,
ormai, no’ si ‘rricòrdunu
cè sontu li tulùri.
Fatìunu intra e fori,
ti notti, giurnu e sera,
la vita ca sta tìrunu
è comu ‘na calèra.
E Tu, Matonna mia,
ca viti ciò ca fannu,
pirdònili ci a messa
vannu ‘na vot’all’annu.
E’ corpa ti la ventri
ca no’ va’ sempri chiena,
cancella li piccati
e puru la jastèma.
L’offerta alla Matonna
Girava nu picuèzzu pi’ ‘ccogghiri quarcosa,
tuzzàu a ‘na vitrina e assìu ‘na carosa,
assìu pi’ ‘ddummandari
ce cosa l’er’a dari.
“‘N’offerta alla Matonna”, tissi stu sacristano,
mustrandu la cascetta e li santilli ‘n manu.
“Sordi? Ca ce àgghiu vindimatu?”
tissi la carosa allu monucu spugghiàtu,
“Ti ciciri o ti favi, ti ènchiu la pignàta,
propria pi’ la Matonna, ca sempri agghiù priàta.”
“Sti cosi no’ li vògghiu. Cè mangia la Matonna?
‘Nci vòlunu li sordi cu giusti la culònna.”
”Certu ca si’ curiùsu” risposi la carosa,
“ci tu no’ vue’ li favi, ti tàu na bella rosa.”
“Allora no’ capisci, li sordi tu m’à dari,
giustamu la culònna ca l’am’a ‘nquacinàri.”
“Mi sembra e mi sta pari ca no’ ni vue’ pasuli,
ci ha ‘ccogghiri li sordi, ti tocc’alli pizzùli;
pàssunu li signuri li viti ‘mpirnacchiati,
làssunu l’offerti e si pàiunu li piccati.
La genti com’a mei camina a capusotta
e spacca lu cintèsumu cu ccatta na pagnotta.
Quddu ca ti sta dicu, èti la viritati
e stàttini sicuru ca La Matonna sapi”
Emanuele Castrignanò
*********************
La Matonna ti firbaru
La Matonna ti firbaru
veni ‘ntra nu mesi amaru,
e no’ manca l’occasioni
pi no’ fa la prucissioni.
Ma la genti pi la via,
sia ca chiovi o jentu sia,
spetta osci spetta crai
ma ti da no’ si ni vai.
Nc’è na crandi tivuzioni
s’av’a fa’ la prucissioni!
Si ringrazia la Matonna,
sia lu quatru o la culonna,
ca Misciagni fo sarvata
e di uài fo javitata,
toppu ch’Edda fo priata
ti na folla tispirata.
Fora tanti li cristiani,
cu li croni ‘ntra li mani,
ca circara prutizioni
senz’ aviri tistruzioni.
Nu paisi l’acclamàu:
“Prutittrici” ddivintàu.
E di tannu a ciunca è natu,
allu Càrmunu è purtatu:
ddò si menti l’Abitinu
ti Maria cu lu Mamminu.
Emanuele Castrignanò
Scuola Secondaria Superiore
ISTITUTO DI