mesagne.net

Riceviamo e volentieri pubblichiamo il nuovo componimento di Emanuele Castrignanò

 

in tema con le prossime consultazioni elettorali.

 

 

Mamma mia, ce  cunfusioni,

ca sta’ ‘rriunu li lizzioni!

Mo’ lu Sinducu  am’a fari

e iu no sacciu a ci vutari.

 

No si sta capisci nienti,

tanti listi e pretendenti.

Puru lu scumunicatu

s’è di fattu cunfissatu

 

e, ‘ntra giri e riuniuni,

vai a messi e prucissiuni.

Tutti volunu vutati,

tutti so’ senza piccati!

 

E li viti circantini

comu tanti pillicrini.

Quantu sordi hann’a sganciari

cu si fannu, po’, vutari.

Sordi liquiti e  contanti

tra binzina, ristoranti,

facchessimili stampati

cu paroli  ‘nfarfugghiati.

 

Ti  prugrammi ‘mpapucchiati

nni sta’ ènchiunu li strati;

li  litratti  ‘ngigantiti

ca no sai  ci so pintiti.

 

Tutti beddi ‘mpitturrati,

o so’ mestri o so’ avvucati:

la “Gioconda” hannu studiatu,

‘ddo’ ti minti si’ uardatu.

 

“ Vota a mei, no tĭ sbagliari,

ca iu sacciu cuvirnari ”

E iu, ca zzappu cu piaceri,

vesciu buenu nu trainieri:

 

Ca ci sapi “cuvirnari”,

quandu pensa allu mangiari

no nci ‘bbàta a iddu sulu,

av’a  sta’ cu ‘natru mulu.

 

Vannu an giru  ‘ntrà Misciagni

cu cumandunu cinq’anni !

Ci ti vètunu luntanu

ti sta àzunu la manu,

 

mancu comu to’ cumpari,

pi lu votu ca nci ha’ dari.

‘Ntra Progetti e stringimani

ni sta’ ‘ccòntrunu cristiani!

 

Nc’è  ci voli la fatia,

noni comu sia sia:

assa’ sordi e assicuratu

ci no va’ allu Sindacatu.

 

A ci cerca chiù assistenza,

vistu ca è ‘rrumastu senza.

Nc’è na  strata di sfaltari

o na luci ti cangiari ?

 

“ No v’at’a  preoccupari,

iu ‘gni’ncosa v’agghia a fari !

Vui soltantu at’a vutari

cu mi pozzu sistimari.

 

Ca, ci ‘nchianu veramenti,

prima m’agghi’à fà li tienti,

ca cu pozzu cuvirnari,

ogni cosa agghi’a ‘ssaggiari.”

 

Qustu, è chiaru e sistimatu,

è nu buenu candidatu;

quddu, anveci, ca è scatutu

zittu zittu si n’è sciutu.

 

Pigghia, ‘ntra sta cunfusioni,

cu  va essi nu bitoni ?

No putimu chiù schirzari,

unu buenu am’a vutari.

Iu, cunvintu  veramenti,

votu a quddu ti li tienti:

Sarà puru  capu tuestu,

ma armenu parla onestu.

 

L’è già dittu ce  av’a fari,

prima cosa: Av’a mangiari!

 

Emanuele Castrignanò