mesagne.net

Ce grandi festa ca si faci a lugliu,

tuttu lu paisi si ‘nni v’a’ subbugliu,

si ‘nnùra la Madonna Prutittrici

ti tutti vinirata, ci sa nni ‘bbinitici.

 

Impegni e tradiziuni ti sieculi passati,

li misciagnisi no si l’hannu scurdati.

Ti uài e di discrazi, ti tanni  e distruzioni

‘nni l’hamu scuppulata pi quedda prutizioni.

Si ‘ncegna misi prima a fari e strulicari,

pinsandu a cosi bueni e a cunti ti quatrari.

Nc’eti  nu Cumitatu, ca gira li riuni

pi ‘ccogghiri l’offerti ti crandi e di vagnuni.

Entusiasmu e fatia fatta cu passioni

pi la Matonna nostra purtata ‘mprucissioni.

Crandi fistiggiamienti cu  fuechi, bandi e luci;

nci sta’ na cunfusioni ca vue’ cu ti  nni fuci.

Arrìunu furastieri, arrìunu l’emicranti

cu li mugghieri biondi ‘mpizzati nanti a nanti:

lu veru misciagnesi  an forza  av’a turnari,

veni pi la Madonna ca l’av’a  ssà priari.

La festa  già ‘ccumenza facendu la nuvena,

la chiesa ti lu Carmunu la viti sempri chiena.

E puru lu paisi è prontu e priparatu:

li casi e li facciàti già tuttu ‘nquacinàtu.

Si ‘ppèndunu lampiuni an  gloria ti Maria,

si tìcunu rusari ‘ntra casa o pi la via,

sònunu li campani, essi la prucissioni:

migghiari ti cristiani cu tanta divuzioni.

E quandu poi si ferma ‘mmienzu alla Porta Crandi,

ti pàrunu  furmiculi assi’ ti tutti vandi.

E’ nu mumentu bellu, emozionanti assai,

lu Sinducu a Maria cunsegna quiddi chiai:

E’ segnu ca turnamu a Edda cunsacrati,

puru, ca li jastemi no l’amu sparagnati.

Tornunu tutti l’anni e giostri e bancarelli:

nci truevi la scapeci, pagnotti, caramelli,

lu zuccuru filatu, gilati e po’ spumuni,

tanti scintrusamienti, giucattuli e palluni.

Carùsi e giuvinotti, capiddi sistimati,

si ‘mmùtunu cu ‘rrobbi, appena cunsignati.

Li femmini a passeggiu cu scarpi nuevi e stritti;

maisia si scosi l’àbbutu, li viti tritti-tritti.

Li masculi, ca mangiunu cu puzu e cu sustanza,

portunu la curea ‘chiappata a sottapanza.

Ma quandu a cunclusioni, si ni sta vai la festa,

prutenti Ton Danièli: “Sapiti ce nni resta ci no

cangiamu nui? Restunu to’ taieddi

e po’ li strati  chini ti scorzi ti nuceddi !”