mesagne.net

Lu Cumitatu Festi Patronali

 

Nc’è ‘ na festa  a stu paìsi

ca ha suta’ setti camìsi,

cu la faci propria bona

vistu c’hè pi’ la Patròna:

 

 

la Matonna del Carmelu,

ca ndi veglia ti lu cielu.

Prontu sta ‘nu Cumitatu,

ca ‘gnincosa è priparatu.

 

Ti matina, giurnu e sera,

a gira’ cu la quantièra,

sotta-sobbra lu paìsi,

pi’ circari li turnìsi.

 

Paisàni e furastièri

vann’acchiàndu cosi sèri:

‘ntra la Chiesa lu tusellu

e l’addòbbu lu cchiù bellu,

 

poi, la banda ti Squinzanu

e li fuèchi ti Latianu,

archi e pali ‘lluminati

cu li luci culurati.

 

Crazzi a quru Cumitatu,

ca no’ si ne virgugnàtu

pi’ li sordi c’hè circàti

e no’ tutti l’hannu tati.

 

Ci li sordi no’ li tài

loru stannu ‘ntra li uài,

ma ci siènti li cristiani:

“nc’è lu bucu ‘ntra li mani”.

 

A sparla’ so’ li ruscùni,

cu li poti a tre buttùni,

bueni, sulu, a mmurmuràri,

senza sordi ti cacciàri.

 

La Matonna, è risapùtu,

mai mangiàtu e mai nbivùtu.

Ma ci, poi, lu Cumitatu

si va ccatta ‘nu gilatu

 

o li scappa ‘na mangiata,

no’ vi pari mmiritàta?

Emanuele Castrignanò

Luglio 2010